ພິທີມອບ-ຮັບເວັບໄຊ https://www.itvet-odx.edu.la

 

ໃນຕອນແລງຂອງມື້ວັນພຸດ, ວັນທີ 17/10/2018 ຜ່ານມານີ້ ທາງຄະນະນໍາ ແລະ ວິຊາການ ຈາກພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ນຳໂດຍ ທ່ານ ສົມບຸນ ມະນີ ຮອງເລຂາຄະນະພັກຮາກຖານ ຮອງຫົວໜ້າ ພະແນກ ໄປສະນີ, ໂທລະຄົມມະນາຄົມ ແລະ   ການສື່ສານແຂວງ ໄດ້ນຳພາທີມງານລົງມອບ-ຮັບເວັບໄຊ໌ ຢ່າງເປັນທາງການ ລະຫວ່າງ ພະແນກ ໄປສະນີ, ໂທລະຄົມມະນາຄົມ ແລະ ການສື່ສານແຂວງ ແລະ ໂຮງຮຽນ ເຕັກນິກ-ວິຊາຊິບແບບປະສົມ ແຂວງອຸດົມໄຊ ພ້ອມທັງເຜີຍແຜ່ນິຕິກຳຈຳນວນໜຶ່ງກ່ຽວກັບວຽກງານໄປສະນີ, ໃຫ້ກຽດເຂົ້າຮ່ວມຮັບເວັບໄຊ https://www.itvet-odx.edu.laໂດຍທ່ານ ທ່ານ ເພັດພະລັງ ປັນຍາວົງ ຮັກສາການຜູ່ອໍານວຍການໂຮງຮຽນ ພ້ອມທັງຄູ-ອາຈານ ແລະ  ນັກສຶກສາພາຍໃນໂຮງຮຽນເຂົ້າຮ່ວມເປັນຈຳນວນ 40 ກວ່າຄົນ. ໃນພິທີໄດ້ມີການເຜີຍແຜ່ກົດໝາຍວ່າດ້ວຍການໂທລະຄົມມະນາຄົມ, ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງຄອມພິວເຕີ ແລະ ດຳລັດວ່າດ້ວຍການຄູ້ມຄອງຂໍ້ມູນຂ່າວສານຜ່ານລະບົບອິນເຕີເນັດ ເພື່ອເຮັດໃຫ້ພະນັກງານ- ລັດຖະກອນ ແລະ ນັກສຶກສາທີ່ເຂົ້າຮ່ວມ ໄດ້ຮັບຮູ້ ແລະ ເຂົ້າໃຈກ່ຽວກັບວຽກງານໄປສະນີ, ໂທລະຄົມມະນາຄົມ ແລະ ການສື່ສານຫຼາຍຂຶ້ນ ໂດຍສະເພາະແມ່ນການນຳໃຊ້ສື່ອອນລາຍ ແລະ ການເຜີຍແຜ່ຂໍ້ມູນຂ່າວສານຜ່ານລະບົບອິນເຕີເນັດເພື່ອໃຫ້ຖືກຕ້ອງຕາມລະບຽບ-ກົດໝາຍທີ່ໄດ້ກຳນົດໄວ້. ໃນໂອກາດດຽວກັນນີ້ ທ່ານ ສົມບຸນ ມະນີ ຍັງໄດ້ເວົ້າເຖິງ ຄວາມໝາຍຄວາມສຳຄັນຂອງເວັບໄຊ໌ ເຊິ່ງໃນສັງຄົມປະຈຸບັນ ການພົວພັນຕິດຕໍ່ສື່ສານໄດ້ມີການຂະຫຍາຍຕົວຢ່າງໄວວາ.

ດັ່ງນັ້ນ, ການນຳໃຊ້ອິນເຕີເນັດ ແລະ ເວັບໄຊຈຶ່ງໄດ້ຮັບຄວາມນິຍົມກັນໃນທົ່ວໂລກ ແລະ ມີບົດບາດສຳຄັນໃນການດຳລົງຊີວິດຂອງມະນຸດ, ການພັດທະນາເສດຖະກິດ-ສັງຄົມ ຂອງບັນດາປະເທດຕ່າງໆໃນທົ່ວໂລກ ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ. ສະນັ້ນ, ອົງການຈັດຕັ້ງນັບທາງພາກລັດ ແລະ ເອກະຊົນ, ຫົວໜ່ວຍທຸລະກິດຕ່າງໆ ຈື່ງມີຄວາມຈຳເປັນໃນການຕິດຕໍ່ສື່ສານຜ່ານລະບົບອິນເຕີເນັດ ແລະ ຈຳເປັນຕ້ອງມີເວັບໄຊເປັນຂອງຕົວເອງ ເພື່ອເປັນການເຜີຍແຜ່ຂໍ້ມູນຂ່າວສານ, ບັນດານິຕິກຳ, ພາລະບົດບາດ, ການເຄື່ອນໄຫວຂອງອົງການຈັດຕັ້ງຂອງຕົນເອງ,   ການແລກປ່ຽນຂໍ້ມູນ-ຂ່າວສານ, ເພື່ອເພີ່ມຊ່ອງທາງໃນການໂຄສະນາປະຊາສຳພັນໃຫ້ມີຄວາມສະດວກ, ວ່ອງໄວປະຫຍັດເວລາ ແລະ ສາມາດອັບໂຫລດ, ດາວໂຫລດເອະກະສານ ແລະ ຂໍ້ມູນຕ່າງໆໄດ້ ເຊິ່ງຈະເປັນການກ້າວເຂົ້າສູ່ລະບົບເຕັກໂນໂລຊີຂໍ້ມູນ-ຂ່າວສານ ແລະ ການຕິດຕໍ່ສື່ສານທີ່ບໍ່ມີພົມແດນຢ່າງເຕັມຮູບແບບ. ສະນັ້ນ, ການອອກແບບ ແລະ ສ້າງເວັບໄຊ ໃຫ້ແກ່ໂຮງຮຽນເຕັກນິກ-ແບບປະສົມແຂວງອຸດົມໄຊ ໃນຄັ້ງນີ້ ຈຶ່ງເປັນວຽກງານໜື່ງທີ່ຈຳເປັນ ແລະ ມີບົດບາດສຳຄັນທີ່ສຸດເພື່ອນຳໃຊ້ເປັນສື່ໃນການເຜີຍແຜ່ຂໍ້ມູນຂ່າວສານ ແລະ ປະຊາສຳພັນເພື່ອຮັບໃຊ້ວຽກງານການຮຽນ-ການສອນ, ການໂຄສະນາຕ່າງໆໃຫ້ມີປະສິດທິຜົນດີຂຶ້ນເລື້ອຍໆ.

ຫຼັງຈາກນັ້ນ ທ່ານ ເພັດພະລັງ ປັນຍາວົງ ຮັກສາການຜູ່ອໍານວຍການໂຮງຮຽນກໍໄດ້ຂື້ນກ່າວຮັບເວັບໄຊ໌ ແລະ ກ່າວຄຳຂອບໃຈ ຕໍ່ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ທີ່ໄດ້ໃຫ້ການຊ່ວຍເຫຼືອໃນການອອກແບບ ແລະ ສ້າງເວັບໄຊ໌ໃຫ້ແກ່ໂຮງຮຽນ ພ້ອມທັງສະແດງຄວາມດີອົກດີໃຈທີ່ໂຮງຮຽນຈະໄດ້ມີເວັບໄຊ໌ເປັນຂອງຕົນເອງ ແລະ ຈະນຳໃຊ້ເວັບໄຊ ທີ່ສ້າງຂື້ນມານີ້ເພື່ອໄປຮັບໃຊ້ວຽກງານໃຫ້ເກີດປະໂຫຍດສູງສຸດໂດຍສະເພາະແມ່ນວຽກງານການຮຽນ-ການສອນ, ການໂຄສະນາໃນການເຄື່ອນໄຫວກິດຈະກໍາຕ່າງໆຂອງແຕ່ລະສາຂາພາຍໃນໂຮງຮຽນ ແລະ ວຽກງານກິດຈະກໍານອກຫຼັກສູດອີກດ້ວຍ.

ທ່ານສາມາດອ່ານບົດຄວາມອື່ນຂອງພວກເຮົາໄດ້ຈາກ http://www.itvet-odx.edu.la/
ຫຼື ຕິດຕາມທາງ Facebook: ໂຮງຮຽນ ເຕັກນິກ-ວິຊາຊີບແຂວງອຸດົມໄຊ ຂອງພວກເຮົາໄດ້.

 

–ໂດຍ: ຄໍາແພງ–